Trasa kiero trzeja przelecieć na Marathon Silesia 2012


Gości dziś u nas  Klaudia Roksela, redaktorka strony gryfnie.com która przygotowała gryfny opis trasy naszego maratonu. Dziękujemy i zapraszamy do lektury:

Kryska startowo namalowano je przy Aleji Korfantego na jezdni wschodnij kole Spodka. Piyrszo komynda, pora gibkich wdechów i zaczynomy. Nojprzód Spodek, miyjsce kiere futruje nos gryfnom muzykom, szportym a fajnistymi wydarzyniami. Dalij cisnymy kusek Alejom Roździyńskigo, mijomy blokowiska „Gwiozdy” w kierunku Sosnowca i skręcomy na ulica Uniwersytecko, Moniuszki, Szkolno, Warszawsko, Mielęckigo, Mariacko, Francusko, Wojewódzko, Damrota. Tukyj je gmach biblioteki, naszyj śląskij kopalni wiedzy czyli Biblioteki Śląskij. Jeji zbiory som tak łogromne i bogate, że kożdy znajdzie tu cosik dlo siebie.

Kole pięć kilometrów trzeja, coby przelecieć przez stolica Śląska. Spokojniyszym miyjscym na trasie są Sztauwajery, pora kroków łod Muchowca, kaj przilatują i łodlatują fligry.

Latoś trefiła się łokazjo, że trasa bydzie przebiygała przez Nikiszowiec. Naprowda piykne miyjsce, inkszy świat, choby z bojki. Zdaje się, że wszysko mo tu swój porządek, czuje się w tym ręka człowieka, kierom pokierowoł som Pon Boczek.

Dalij wlatujymy do Szopiynic, dzielnicy kolejarzy, grubiorzy i hutników. I nazod do cyntrum Katowic Alejom Roździyńskigo. Trzeja się trocha namachać. Ale wort dlo takigo widoku. Hań po lewyj widać kopuła katowickij Archikatedry, po prawej stronie Spodek a na przodku Rondo Sztuki.

Fest wysoko górka i wlatujymy na ulica Telewizyjno, Katowicko i Staszica w Siymianowicach Śląskich. We centrum trzeja se dać pozór coby niy usnyć. Między kamiynicami wonio już śląskim łobiadym:  roladom, gałuszkami i modrą kapustą. Niy usnymy, bo niy dadzą nom bajtle z siymianowickich szkół, kiere zagrzywają do gibszego lotanio. A potym zaś bydzie pod górka, skąd kaj wejrzymy na lewo, to uwidzymy zachacharzone miyjsca po grubach. A po prawyj inkszy świat, łąki i łosiedla. Lecymy dalij.

Terozki my są we Chorzowie Starym. Wto tu niy miyszko,ł niy poradzi se wyłobrazić, co się tukyj dzioło. Wiela szycht łobrobiło. Łostały ino sebleczone hale ze Huty Kościuszko i hołdy, na kierych czasym widać skokające jak sorniki bajtle. Świyczka kero się tukyj tlyła już downo zgasła.

Łostało yno 2 km plaskatyj trasy w szykownym Wojewódzkim Parku Kultury i Rozrywki we Chorzowie. Tukyj je raj dlo tych, kierzy radzi szpacyrują. We Planetarium idzie połoglądać gwiozdki na gipsdece, we  Łogrodzie Zoologicznym podziwać się afom. A potym pobrusić we Wesołym Miasteczku na kecioku, abo poszczylać ze flinty. Dalij na trasie momy Rosarium kaj idzie się powoniać i łoboczyć nojwiększo kolekcja rołzy we Europie. A potym jeszcze Chorzowski skansyn, kiery pokazuje jak downij ludzie żyli na Śląsku. Po drodze momy tyż Stadion Śląski, kaj richtik chopy grają w bala. Jeszcze ino pora metrów i fajrant. Bydzie się już szło dychnyć.

Reklamy

2 thoughts on “Trasa kiero trzeja przelecieć na Marathon Silesia 2012”

Skomentuj

Wprowadź swoje dane lub kliknij jedną z tych ikon, aby się zalogować:

Logo WordPress.com

Komentujesz korzystając z konta WordPress.com. Wyloguj / Zmień )

Zdjęcie z Twittera

Komentujesz korzystając z konta Twitter. Wyloguj / Zmień )

Zdjęcie na Facebooku

Komentujesz korzystając z konta Facebook. Wyloguj / Zmień )

Zdjęcie na Google+

Komentujesz korzystając z konta Google+. Wyloguj / Zmień )

Connecting to %s